MEDICINA

Një person i cili përjeton vazhdimisht dhimbje bën një jetë jo cilësore, me lëvizje të kufizuara dhe probleme në marrëdhëniet sociale dhe profesionale. A keni edhe ju dhimbje të përditshme të cilat ju pengojnë të bëni një jetë normale? Çfarë mund të bëni për të shpëtuar nga ato?

Ja disa veprime që do t’jua lehtësojnë dhimbjet sipas një lajmi të publikuar në faqen “WebMD”:

Merrni pak endorfinë: kur nuk bëni ushtrime humbisni dendësinë e muskujve dhe fuqinë, e kjo përkeqëson dhimbjet. Edhe një ushtrim i thjeshtë që mund të bëni do të mundësojë lëshimin e endorfinës në tru e cila heq dhimbjen. Pyesni mjekun tuaj nëse ushtrimet aerobike, relaksuese apo lloje të tjera ndikojnë pozitivisht apo jo  në trupin tuaj.

Frymëmarrja, Biofeedback: bëni pak pushim dhe qetësoni mendjen. Merrni dhe jepni frymë  dhe Biofeeedback (një teknikë e cila të mëson relaksimin nga ana psikologjike dhe kontrollimin e shenjave të para të tensionimit të trupit nga stresi) do t’ju ndihmojë të luftoni stresin. Ju qetëson trupin dhe lehtëson dhimbjet.
Lëreni cigaren: disa njerëz mendojnë se cigarja pakëson dhimbjet dhe stresin. Përkundrazi cigarja mund të shtojë dhimbjet duke shtuar kohëzgjatjen e tyre, ngadalëson përmirësimin dhe shton rrezikun e problemeve  degjenerative të diskut të cilat shkaktojnë dhimbje beli. Përpiquni ta lini sa më pare cigaren.

Ushqehuni më mirë: nëse vuani nga dhimbje kronike mundohuni të bëni të pamundurën për të mirën e trupit. Një rrugë e përforcimit të trupit është dhe ushqyerja e ekuilibruar. Ushqyerja e ekuilibruar rregullon nivelin e sheqerit në gjak, kontrollon peshën, minimizon rrezikun e sëmundjeve të zemrës dhe ndihmon në tretjen e ushqimit. Drithërat, zarzavatet e freskëta dhe frutat  janë  të pasura me proteina jo të yndyrshme.

Mbani një fletore dhimbjesh: mbajtja e një fletoreje për dhimbjet ndihmon doktorin tuaj në kurimin sa më efektiv të dhimbjeve. Vlerësoni dhimbjen me shifra nga 1 deri në 10. Mbani shënim aktivitetet ditore dhe mënyrën si jeni ndjerë gjatë tyre. Merreni me vete fletoren kur shkoni tek doktori.

Qetësohuni dhe vendosni kufij: nëse tregoheni të kujdesshëm ndaj shëndetit tuaj fizik dhe shpirtëror atëherë kjo do t’ju ndihmojë të luftoni më mirë dhimbjet. Nëse ndiheni të lodhur pushoni të paktën një ditë.

Merruni me ndonjë punë: nëse fokusoheni mbi dhimbjen do ta ndjeni më shumë atë. Për këtë arsye merruni me aktivitete që ju bëjnë ta harroni ose hiqni mendjen nga dhimbja.

Njihni mirë ilaçet: mësoni mirë dobitë dhe efektet anësore të ilaçeve që përdorni. Pastaj mësojeni veten dhe me alternativa të tjera kurimi. Qëllimi juaj kryesor është të keni një  shëndet emocional normal dhe aftësi lëvizëse.

Nuk jeni vetëm: një nga tre persona vuajnë nga dhimbje kronike. Prandaj është shumë e rëndësishme të zhvilloni disa zakone pozitive të cilat ju ndihmojnë të luftoni dhimbjen. Shpjegojani familjes dhe të afërmve tuaj çfarë ndjeni kur keni dhimbje. Sepse të tjerët nuk mund të kuptojnë  ndjenjat tuaja. Kërkoni ndihmë, mësoni më shumë rreth gjendjes suaj dhe ndajeni këtë me njerëz të tjerë.

(4026 herë i lexuar)     publikuar më 10.05.2012 në 15:15 nga X.J.

KOMENTI

LAJMET E FUNDIT

LAJMET MË TË LEXUARA