Haradinaj: Ne duhet të kthehemi në një komb inovativ në ekonomi
kosova
Haradinaj: Ne duhet të kthehemi në një komb inovativ në ekonomi

Haradinaj: Ne duhet të kthehemi në një komb inovativ në ekonomi

Prishtinë, 25 mars - Kryeministri Ramush Haradinaj mori pjesë në takimin e Këshillit Kombëtar për Inovacion dhe Ndërmarrësi, në të cilin u prezantua puna e Ministrisë së Inovacionit dhe Ndërmarrësisë dhe ku u diskutuan hapat e mëtutjeshëm për zhvillim në fushën e inovacionit dhe ndërmarrësisë.

Haradinaj tha se nuk ka njeri në glob që nuk është i ekspozuar domosdoshmërisht të ecë me ato që ndodhin në jetën e njerëzimit, me atë që konsiderohet një revolucion digjital dhe në këtë drejtim edhe Kosova është pjesë e kësaj lëvizjeje.

“Jemi para një presioni të madh, si kohor, si të kërkesave praktike të mënyrës së jetesës, të bërit ekonomi, të veprimit të vlerës së re, pra një revolucion është duke ndodhur në botë dhe ne nuk bëjmë përjashtim, duhet të bëhemi të përgjegjshëm me këtë dhe të gjejmë perspektivën tonë”.

Ai tha se populli i Kosovës është një prej vendeve që ka shtrirje shumë të gjerë të përdoruesve të internetit dhe fakti se mbi 70 për qind e prodhimit ose veprimtarisë në teknologji informative biznesore është për eksport, flet shumë.

“Ne kemi plot sfida sa i përket zhvillimit ekonomik. Arsimi dual është sfidë, trajnimi, kualifikimi i mëtejmë për këto trende globale të të bërit biznes, po ashtu është sfidë dhe jam i interesuar si Qeveri, pas parasysh faktin që kemi ministrinë e Inovacionit, kemi fondin, që t’iu qëndrojmë afër të gjithë atyre që janë ekzistues në të bërit biznes në teknologji ose digjital ekonomi dhe atyre që janë kandidatë potencialë në të ardhmen”.

Ministri i Inovacionit dhe Ndërmarrësisë, Besim Beqaj, tha se do ta japin kontributin e tyre në fjalën e dhënë të kryeministrit, i cili këtë vit e ka shpallur si vit ekonomik derisa ka prezantuar punën që është bërë deri tash nga Ministria e Inovacionit.

“Kemi hartuar Strategjinë Kombëtare për Inivacion dhe Ndërmarrësi. I kemi hapur rrugë Ligjit për Inovacion dhe Ndërmarrësi duke e dërguar në Kuvend. Me përkrahjen e jashtëzakonshme të Kryeministrit Haradinaj, kemi kryer shumë punë në këtë fushë, dhe po vazhdojmë të bëjmë punë të mëdha”.

“Ministria e Inovacionit këtë vit ka fondin prej 12 milion euro, dhe presim që ky fond të rritet fale përkrahjes së partnerëve tanë strategjik. Pritet së shpejti të realizohet projekti në vlerë prej 8 milion eurove nga Banka Botërore”, tha ministri Beqaj i cili më pas propozoi që të ndryshohet emri i Këshillit nga Këshilli për Inovacion dhe Ndërmarrësi në Koalicionin Digjital.

Kryeministri në këtë takim tha se Kosova duhet të shndërrohet në një komb ekonomik dhe digjital duke shtuar se përkrahja e rreth 160 bizneseve fillestare dhe investimi në Parkun Inovativ dhe Trajnues janë dy veprime konkrete të agjendës ekonomike që ka Qeveria.

Ai premtoi se në këtë drejtim do të ofrohet mbështetja e nevojshme për nismat e kësaj natyre.

© ZHURNAL 25.03.2019, 15:59 | Z.H. | 352 I LEXUAR
"Kopjimi i kësaj përmbajtjeje ose një pjese të saj pa ndonjë marrëveshje të arritur me redaksinë e ZHURNAL.al, do të thotë se pranoni kushtet për kopjim, të cilat janë publikuar KËTU."